மௌன மொழிகள்

மௌன மொழிகள் 

ஒரு  கன்னியின்  மௌனம் 

ஒரு  கன்னியின்  மௌனம் அழகானது  ஆழமானது . அழகான  வெட்க உணர்வுகளும்   அன்பின் அரும்புகளும்  அதற்குள்  ஒன்றித்திருக்கும் .  அவளின் கண்ணிமைகளுக்குள்    மறைந்திருக்கும் கனவுகளும் அங்கே மெளன  மொழிகளுக்குள்  மெல்லப்  பதிந்திருக்கும்.  அது யாரிடத்திலும் முழுமையாக வெளிப்படுத்தப்படாத ஆன்மாக்களின்  மொழிகளுக்குள்ளால்  வளர்ந்திருக்கும்.  தீர்க்கப்படாத , மொழிபெயர்க்கப்பட முடியாத மௌனமாகவே அது இருக்கும்.

ஒரு முதியவரின் மௌனம் 

பல  கட்டங்களைக்  கடந்து  அனுபவங்களில் உயர் பதவி பெற்ற  வயதில் ஒரு முதியவரின் மௌனம்  ஆயிரம் வார்த்தைகளைச்  சுமந்து நிற்கும் .  தன்  நீண்ட  மௌனங்களைக்   கலைக்க யாராவது வந்து பேச மாட்டார்களா என்ற ஏக்கம் அந்த முதியவரை சுற்றியிருக்கும்  அவரது  உடல் தோற்றத்தில் அங்க அசைவுகளில் அது வெளிப்படும் . 





ஒரு குழந்தையின்  மௌனம் 

துள்ளித் திரிய வேண்டிய வயதில் குதூகலிக்க வேண்டிய இடத்தில் ஒரு குழந்தை மெளனித்தே இருக்கின்றது  என்றால் அது மன ரீதியாகப் பாதிக்கப்பட்டிருக்கின்றது என்று அர்த்தம் . அன்பு ,     அரவணைப்பில் ஏதோவொரு  இடத்தில் அது   தவற விடப்பட்டிருக்கின்றது என்று அர்த்தம் .   அக்குழந்தை , தாயின் அன்பில் தந்தையின் அரவணைப்பில் பூரணத்துவத்தை வேண்டி நிற்கின்றது.  ஏனென்றால் தந்தையின் அரவணைப்பு சரியாக கிடைக்கப்பெற்ற குழந்தை தைரியமாகவும்  தாயின் அன்பு  சரியாகக் கிடைக்கப்பெற்ற குழந்தை கலகலப்பாக மகிழ்வாகவும்  இருக்கும் .





உயிர் தோழனின்  மௌனம் 

எப்போதும் உங்களை சந்தோஷப்படுத்துகின்ற  ஏதாவது  சொல்லிக் கொண்டு  பேசிக் கொண்டே இருக்கின்ற  உங்கள்  தோழன்  அல்லது  தோழி  மௌனமாக இருந்தால் உங்கள் ஆதரவை  அவர் எதிர்பார்த்து இருக்கின்றார் என்று அர்த்தம் . சந்தோசப்படுத்தவோ  மெளனம்  கலைத்துப் பேசிக் கொண்டிருக்கவோ அன்றைய நாளில் உங்கள் பேச்சுக்களையே அந்த மெளனம் வேண்டி நிற்கின்றது .